Mamlaka ya Ushuru nchini (KRA) imevamia kiwanda cha kutengeneza pombe haramu katika eneo la Athi River, Kaunti ya Machakos. Mtengenezaji wa bia, Elle Kenya Limited anashukiwa kuzalisha pombe haramu katika moja ya maghala ndani ya kongoni go-downs.

Maafisa wa KRA kwa ushirikiano na timu ya Multiagency jijini Nairobi walifanya uvamizi katika ghala hilo Jumatano alasiri kufuatia kudokezwa. Maafisa hao hata hivyo walilazimika kukita kambi nje ya majengo hayo hadi Alhamisi asubuhi baada ya wafanyikazi 24 kujifungia ndani ya kiwanda hicho na kuharibu bidhaa nyingi zikiwemo lita kadhaa za chupa. Everest Vodka.  

Uharibifu huo uliacha vipande vya glasi kutawanyika kote na mafuriko ya pombe kwenye sakafu ya ghala ambapo njia ya utengenezaji ilikuwa imewekwa. Kando na mashine ya kutengenezea, pia ngoma tupu za lita 133-250 za ethanol na lori pia zilipatikana kutoka kwa kiwanda hicho.

Inaaminika kuwa wafanyikazi hao waliamriwa kuondoa ethanol yote na kuchoma stempu ghushi ili kuharibu ushahidi muhimu. Wafanyikazi hao 24 wamekamatwa na vitu kadhaa vimenaswa wakisubiri uchunguzi zaidi.

KRA imeongeza umakini nchini kama sehemu ya hatua kuu zinazolenga kuongeza vita dhidi ya biashara haramu na bidhaa ghushi. Kando na ukusanyaji wa mapato, mamlaka ya KRA yanahusu kulinda jamii dhidi ya kuenea kwa bidhaa hatari.

Walipakodi wanahimizwa kuendelea kutii sheria za kodi ili kuepuka hatua za kutekeleza adhabu ikiwa ni pamoja na kufunguliwa mashtaka.

Kamishna, Uchunguzi na Utekelezaji-Dk. Edward Karanja